நீங்கள் தேடியது "கேரளாவில் மழை"

கூடலூர்:

கேரள மாநிலத்தில் கன மழை பெய்தது. இதனால் அந்த மாநிலம் கடுமையாக பாதிக்கப்பட்டது. நீர்பிடிப்பு பகுதியிலும் மழை தொடர்ந்ததால் அணையின் நீர்மட்டம் 142 அடியை எட்டியது.

அதன்பின்பு மழை குறைந்ததால் நீர்மட்டம் வேகமாக சரிய தொடங்கியது. எனவே தற்போது அணையின் நீர்மட்டம் 138.47 அடியாக உள்ளது. நேற்று வரை 947 கன அடி நீர் வந்துகொண்டிருந்தது.

இன்று காலை அது 1450 கன அடியாக உயர்ந்துள்ளது. அணையில் இருந்து தமிழக பகுதிக்கு 2206 கன அடி நீர் திறந்து விடப்படுகிறது.

வைகை அணைக்கு நீர்வரத்து 1777 கன அடியாக உள்ளது. அணையில் இருந்து குடிநீர் மற்றும் பாசனத்திற்காக 2030 கன அடி நீர் திறக்கப்படுகிறது. அணையின் நீர்மட்டம் 69.29 அடியாக உள்ளது.

மஞ்சளாறு அணையின் நீர்மட்டம் 41.75 அடியாக உள்ளது. வரத்தும் திறப்பும் இல்லை. சோத்துப்பாறை அணையின் நீர்மட்டம் 116.76 அடியாக உள்ளது. வரத்து இல்லாத நிலையில் 3 கன அடி நீர் திறக்கப்படுகிறது. பெரியாறு 10.4, தேக்கடி 11.4, கூடலூர் 1.7, உத்தமபாளையம் 0.8 மி.மீ. மழை அளவு பதிவாகி உள்ளது.

பாவூர்சத்திரம்:

தெட்சிண அகோபிலம் என்று அழைக்கப்படும் கீழப்பாவூர் நரசிம்மர் கோவிலில் சுவாதி நட்சத்திர பூஜை நேற்று (வெள்ளிக்கிழமை) நடைபெற்றது. அப்போது கேரளாவில் மழை, வெள்ள பாதிப்புகள் குறைந்து இயல்பு நிலை திரும்பவேண்டி பூஜைகள் நடத்தப்பட்டன.

விழாவையொட்டி மாலை 3 மணி அளவில் 16 வகையான மூலிகைகளால் மூலமந்திர ஹோமம், விஷ்ணு சூத்த ஹோமம், மன்யு சூத்த ஹோமம், பாக்ய சூத்த ஹோமம், மகாலட்சுமி ஹோமம் நடந்தது. தொடர்ந்து சிறப்பு அபிசேகமும், பெருமாள் சப்பரத்தில் தீர்த்தவலம் வருதல், தீபாராதனை நடைபெற்றது. இதில் திரளான பக்தர்கள் கலந்து கொண்டனர்.

இதற்கான ஏற்பாடுகளை இந்து சமய அறநிலையத்துறையினர், ஸ்ரீசாம்ராஜ்ய லட்சுமி நரசிம்ம பீடத்தினர், நரசிம்ம சுவாமி கைங்கர்ய சபையினர் செய்திருந்தனர்.

சென்னை:

முதல்-அமைச்சர் எடப்பாடி பழனிசாமி வெளியிட்டுள்ள அறிக்கையில் கூறி இருப்பதாவது:-

நமது அண்டை மாநிலமான கேரளாவில், வரலாறு காணாத கனமழையின் காரணமாக பல மாவட்டங்கள் வெள்ளத்தால் சூழப்பட்டு, மக்களின் இயல்பு வாழ்க்கை முற்றிலுமாக பாதிக்கப்பட்டுள்ளது.

இதுவரை 300க்கும் அதிகமான மக்கள் உயிரிழந்துள்ளதாகவும் தெரியவருகிறது. இந்த தொடர் கனமழையின் காரணமாக உயிரிழந்து வாடும் குடும்ப உறுப்பினர்களுக்கு, தமிழ்நாடு மக்களின் சார்பிலும், தமிழ்நாடு அரசின் சார்பிலும் என்னுடைய ஆழ்ந்த இரங்கலையும், அனுதாபங்களையும் தெரிவித்துக் கொள்கிறேன்.

இது சம்பந்தமாக, 10.8.2018 அன்று, முதல்-அமைச்சரின் பொது நிவாரண நிதியிலிருந்து 5 கோடி ரூபாய் மீட்பு மற்றும் நிவாரணப் பணிகளுக்காக அளித்திருந்தேன்.

மேலும், தமிழ்நாடு மக்களிடமிருந்து இதுவரை பல கோடி ரூபாய் மதிப்பிலான நிவாரணப் பொருட்கள் பெறப்பட்டு, கேரள மாநிலத்திற்கு அந்தந்த மாவட்ட நிர்வாகங்கள் மூலம் ஒருங்கிணைத்து அனுப்பி வைக்கப்பட்டுள்ளன. இப்பணி தொடர்ந்து நடைபெறும்.

தற்போது அங்குள்ள பாதிப்பின் தன்மையை கருத்தில் கொண்டு, முதல்- அமைச்சரின் பொது நிவாரண நிதியிலிருந்து கூடுதலாக 5 கோடி ரூபாய் அளிப்பதுடன், பாதிக்கப்பட்ட கேரள மக்களுக்கு நிவாரணப் பொருட்களாக, 500 மெட்ரிக் டன் அரிசி, 300 மெட்ரிக் டன் பால்பவுடர் மற்றும் 15 ஆயிரம் லிட்டர் உயர் வெப்ப நிலையில் பதப்படுத்தப்பட்ட பால், வேட்டிகள், கைலிகள், 10 ஆயிரம் போர்வைகள், அத்தியாவசிய மருந்துகளுடன் மருத்துவம் மற்றும் கால்நடை மருத்துவக் குழுக்கள் ஆகியவை உடனடியாக அனுப்பி வைக்கப்படும்.

இப்பணிகளை ஒருங்கிணைக்க தமிழ்நாடு அரசின் வருவாய் நிர்வாக ஆணையரின் தலைமையின் கீழ், இரண்டு மூத்த இந்திய ஆட்சிப் பணி அதிகாரிகள் சந்தோஷ்பாபு மற்றும் டரேஸ்அகமது ஆகியோர் பணியாற்ற நான் உத்தரவிட்டுள்ளேன்.

இவ்வாறு முதல்-அமைச்சர் எடப்பாடி பழனிசாமி கூறியுள்ளார். #KeralaRain #KeralaFlood #TNCM #EdappadiPalaniswami

புதுச்சேரி:

புதுவை நகர பகுதிகளில் மேற்கொள்ளப்பட்டு வரும் தூய்மை பணிகள் குறித்து வார இறுதி நாட்களில் கவர்னர் கிரண்பேடி ஆய்வு மேற்கொண்டு வருகிறார்.

அதன்படி இன்று (சனிக்கிழமை) கவர்னர் கிரண்பேடி உழவர்கரை நகராட்சி பகுதியில் மேற்கொள்ளப்பட்டு வரும் தூய்மை பணிகள் குறித்து அதிகாரிகளுடன் சைக்கிளில் சென்று ஆய்வு செய்தார். பின்னர், கவர்னர் கிரண்பேடி நிருபர்களிடம் கூறியதாவது:-

கனமழை வெள்ளத்தால் பாதிக்கப்பட்டுள்ள கேரள மாநிலத்தில் பிரதமர் மோடி இன்று ஆய்வு மேற்கொண்டு வருகிறார். கேரள அரசுக்கு தேவையான அனைத்து உதவிகளையும் பிரதமர் மோடி செய்வார்.

வெள்ளத்தால் பாதிக்கப்பட்டுள்ள கேரள மக்களுக்கு உதவ வேண்டும். கேரள மக்கள் வெள்ள பாதிப்பில் இருந்து விரைவில் மீண்டு வர நாம் அனைவரும் சேர்ந்து இறைவனிடம் பிரார்த்தனை செய்ய வேண்டும்.

முப்படையை சேர்ந்த வீரர்கள் கேரளாவில் மீட்பு பணிகளில் தீவிரமாக ஈடுபட்டுள்ளனர். நாம் அனைவரும் கேரளாவை நேசிப்பதால் நம்மால் இயன்ற உதவிகளையும் செய்ய வேண்டும்.

இவ்வாறு கிரண்பேடி கூறினார்.

தொடர்ந்து நிருபர்களின் கேள்விகளுக்கு கவர்னர் கிரண்பேடி பதிலளிக்கும் போது, புதுவையில் முதலில் போலீசார் மற்றும் அரசு ஊழியர்கள் கட்டாயம் ஹெல்மெட் அணியும் சட்டத்தை மதிக்க வேண்டும். இருசக்கர வாகனம் ஓட்டும் போது ஹெல்மெட் அணிந்து செல்ல வேண்டும். இதன்மூலம் பொதுமக்களுக்கு தானாக விழிப்புணர்வு ஏற்படும் என்றார். #PuducherryGovernor #Kiranbedi

சென்னை:

கேரளாவில் தொடர்ந்து மழை பெய்து வருவதால் மக்கள் வெள்ளத்தில் சிக்கி பாதிக்கப்பட்டுள்ளனர். குடிக்க தண்ணீர் கூட கிடைக்காமல் கஷ்டப்படுகிறார்கள்.

கேரள மக்களுக்கு உதவ தமிழக அரசு பல்வேறு நடவடிக்கைகளை மேற்கொண்டு வருகிறது. தெற்கு ரெயில்வே மூலம் குடிநீர் வழங்க ஏற்பாடு செய்யப்பட்டது.

இதற்காக பல்வேறு டிவிசன்களில் தண்டவாளங்களை ஏற்றிச் செல்லக்கூடிய காலி வேகன்களை தயார் செய்து சிண்டக்ஸ் தொட்டி மூலம் குடிநீர் அனுப்பும் பணி தீவிரப்படுத்தப்பட்டுள்ளது.

நேற்று ஈரோட்டில் இருந்து 7 வேகன்களில் 38 குடிநீர் தொட்டிகளில் திருவனந்தபுரத்திற்கு தண்ணீர் கொண்டு செல்லப்பட்டது. செங்கல்பட்டு, தண்டையார்பேட்டை ஆகிய பகுதிகளில் இருந்தும் குடிநீர் கொண்டு செல்லப்பட்டன.

இது தவிர 15 ஆயிரம் பெட்டிகளில் குடிநீர் பாட்டில்களும் அனுப்பப்பட்டுள்ளது. 3 ரெயில்களில் குடிநீர் கொண்டு சென்றால் தொடர்ச்சியாக இந்த பணி நடைபெறும் என்று அதிகாரிகள் கருதுவதால் ரெயில்வே பொருட்களை எடுத்து செல்லக்கூடிய வேகன்களை ஒன்று சேர்த்து இன்னும் அதிகளவு குடிநீரை கொண்டு செல்ல தெற்கு ரெயில்வே அதிகாரிகள் திட்டமிட்டுள்ளனர்.

15 ரேக்குகளில் 80-க்கும் மேலான குடிநீர் தொட்டிகளை எடுத்து செல்வதன் மூலம் கேரள மக்களின் குடிநீர் பிரச்சனையை தீர்க்க முடியும். இன்று அல்லது நாளை மீண்டும் குடிநீர் ஏற்றிக் கொண்டு திருவனந்தபுரத்திற்கு ரெயில் செல்ல தயாராகிக் கொண்டிருக்கிறது.

இதுகுறித்து ரெயில்வே அதிகாரிகள் கூறுகையில், கேரளாவில் வெள்ளத்தில் சிக்கி தவிக்கும் மக்கள் குடிப்பதற்கு தண்ணீர் கூட இல்லாமல் கஷ்டப்படுகிறார்கள். ஆதலால் தமிழகத்தில் இருந்து ரெயில் மூலம் அதிகபட்சமாக எவ்வளவு தண்ணீர் கொண்டு செல்ல முடியுமோ அந்த அளவிற்கு எடுத்து செல்ல வேகன்கள் சேகரிக்கப்படுகிறது.

ஈரோட்டில் இருந்து தண்ணீர் எடுத்து செல்ல தேவையான நடவடிக்கைகள் எடுக்கப்பட்டு வருகின்றன. திருவனந்தபுரம் வரை குடிநீர் கொண்டு செல்லப்படும். பின்னர் அங்கிருந்து தேவைப்படும் பகுதிகளுக்கு வாகனங்கள் மூலம் எடுத்து செல்லப்படும் என்றனர். #KeralaRain

திருப்பூர்:

திருப்பூர் மாவட்டம், உடுமலை அமராவதி அணையில் கலெக்டர் டாக்டர். கே.எஸ். பழனிசாமி, தலைமையில் கால்நடை பரமாரிப்புத்துறை அமைச்சர் உடுமலை கே.ராதாகிருஷ்ணன் நேரில் சென்று பார்வையிட்டு ஆய்வு செய்தார். பின்னர் அவர் கூறியதாவது,

அமராவதி அணையின் நீர் பிடிப்பு பகுதிகளில் தென்மேற்கு பருவமழை தீவிரமடைந்து வருவதனால் அமராவதி அணைக்கு வரப்பெறும் நீரின் அளவு வினாடிக்கு 16,233 கன அடியாக உள்ளது. எனவே அணையிலிருந்து வெளியேற்றப்படும் நீரின் அளவு 15,400 கனஅடியாக அதிகரிக்கப்பட்டுள்ளது.

இதனால் உடுமலை வட்டத்தில் ஆற்றின் தாழ்வான பகுதிகளில் அமைந்துள்ள கல்லாபுரம், எலையமுத்தூர் மற்றும் கொழுமம் ஆற்றோரத்தில் வசிக்கும் பொதுமக்களுக்காக கல்லாபுரம் அரசு உயர்நிலைப்பள்ளி , ராஜேஸ்வரி திருமண மண்டபம் கொழுமம் மற்றும் கொழுமம் ஊராட்சி ஒன்றிய தொடக்கப்பள்ளி ஆகிய இடங்களில் நிவாரண மையங்கள் அமைக்கப்பட்டுள்ளது.

இம்முகாம் மூலம் பொது மக்களுக்கு தேவையான குடிநீர், உணவு, மின்சாரம், கழிப்பறை மற்றும் மருத்துவம் போன்ற சுகாதார வசதிகள் ஏற்படுத்தப்பட்டுள்ளது. அதுமட்டுமில்லாமல் வெள்ள அபாயம் உள்ள தாழ்வான பகுதிகளில் உடுமலைப்பேட்டை வருவாய் கோட்டாட்சியர் தலைமையில் குழு அமைக்கப்பட்டு கரையோர பகுதியில் உள்ள பொது மக்களிடம் வெள்ள அபாய எச்சரிக்கை தெரிவிக்கப்பட்டுள்ளது.

இது தொடர்பாக சம்பந்தப்பட்ட பகுதிகளில் வருவாய்த்துறை மற்றும் உள்ளாட்சித்துறையினரால் பொது மக்களிடம் வெள்ள அபாய எச்சரிக்கை தெரிவிக்கப்பட்டுள்ளது. மேலும், வெள்ள அபாயம் உள்ள பகுதிகளில் வசிக்கும் பொதுமக்களை பாதுகாக்கும் பொருட்டு உடுமலைப்பேட்டை மற்றும் மடத்துக்குளம் மண்டல துணை வட்டாட்சியர் தலைமையில் 24 மணி நேரமும் தொடர்கண்காணிப்பு பணியில் களப்பணியாளர்கள் அடங்கிய குழுக்கள் அமைக்கப்பட்டு தீவிரமாக கண்காணிக்கப்பட்டு வருகிறது.

மேலும், மாவட்ட வருவாய் அலுவலர் தலைமையில் திருப்பூர் மாவட்டத்தின் வெள்ள அபாய பகுதிகளை கண்காணிக்க குழுக்கள் அமைக்கப்பட்டு உள்ளன.

மேலும், தமிழக முதலமைச்சர் அவர்கள் ஆணையின் படி, கேரள மாநிலத்தில் வெள்ளத்தால் பாதிக்கப்பட்ட 10 மாவட்டங்களுக்கு கால்நடைகளுக்கு தேவையான தீவனம் மற்றும் மருந்துகள் மற்றும் கால்நடைகளுக்கு பரிசோதனை மேற்கொள்ள இணை இயக்குநர் தலைமையில் 25 பேர் கொண்ட மருத்துவர்கள் குழு அமைக்கப்பட்டு விரைவில் அக்குழுவினர் அங்கு சென்று மருத்துவபணியினை போர்க்கால அடிப்படையில் மேற்கொள்ள அறிவுறுத்தப்பட்டுள்ளது.

இந்நிகழ்ச்சியில் உடுமலைப்பேட்டை வருவாய் கோட்டாட்சியர் அசோகன், அமராவதி அணையின் செயற்பொறியாளர் தர்மலிங்கம், உதவி பொறியாளர் சரவணன், குடிமைப் பொருள் வட்டாட்சியர் தயானந்தன், மற்றும் முன்னாள் உள்ளாட்சி அமைப்பு பிரதிநிதிகள் கூட்டுறவு சங்க தலைவர்கள் உள்ளிட்ட ஏராளமானோர் கலந்து கொண்டனர்.

கொச்சி:

கேரளாவில் பெய்யும் தொடர் மழையில் முல்லைப்பெரியாறு அணை 142 அடியை எட்டி நிரம்பியுள்ளது.

முல்லைப்பெரியாறு அணை கேரளாவில் இருந்தாலும் அதன் பாசன பரப்பு தமிழகத்தின் தேனி, திண்டுக்கல், மதுரை, சிவகங்கை, ராமநாதபுரம் மாவட்டம் ஆகும். இதனால் முல்லைப்பெரியாறு அணையின் நீர் திறப்பு, பராமரிப்பு போன்ற கட்டுப்பாடுகள் தமிழக பொதுப் பணித்துறை வசம் உள்ளது.

முல்லைப்பெரியாறு அணையின் நீர்பிடிப்பு பகுதிகளில் கேரளா சுற்றுலா விடுதிகளையும் கட்டிடம் மற்றும் குடியிருப்புகளையும் கட்டியுள்ளது. இதனால் அணையின் நீர்மட்டம் உயரும் போது இந்த கட்டிடங்கள் நீருக்குள் செல்லும் நிலை ஏற்படுகிறது.

எனவே முல்லைப் பெரியாறு அணை பாதுகாப்பானதாக இல்லை என்று கூறி அணையின் நீர் மட்டத்தை குறைக்க வேண்டும் என்று கேரளா சுப்ரீம் கோர்ட்டில் முறையிட்டது. நீண்ட சட்ட போராட்டத்துக்கு பிறகு 142 அடி வரை தண்ணீர் தேக்கலாம் என்று சுப்ரீம் கோர்ட்டு அனுமதி அளித்தது.

தற்போது மழை வெள்ளத்தை காரணம் காட்டி முல்லைப் பெரியாறு அணையின் நீர்மட்டத்தை 139 அடியாக குறைக்கும் முயற்சியில் கேரளா ஈடுபட்டு மீண்டும் சுப்ரீம் கோர்ட்டில் மனு தாக்கல் செய்துள்ளது. இதில் தமிழக அரசு 142 அடியை குறைக்க முடியாது அணை பாதுகாப்பாக உள்ளது என்று திட்டவட்டமாக தெரிவித்துவிட்டது.

இந்த தகவல் அறிந்த கேரளா மின்சாரத்துறை மந்திரி எம்.எம்.மாணி உடனே மறுப்பு தெரிவித்து அறிக்கை வெளியிட்டுள்ளார். அதில், கேரளாவில் முல்லைப் பெரியாறு அணை உள்பட மாநிலத்தில் உள்ள அனைத்து அணைகளும் பாதுகாப்பாக உள்ளது. முறைப்படி செயல்பட்டு வருகிறது. எனவே வதந்திகளை கேரள மக்கள் நம்ப வேண்டாம். சமூக வலைதளங்களில் வதந்திகளை பரப்புவோர் மீது சட்டநடவடிக்கை எடுக்கப்படும் என்று எச்சரிக்கை விடுத்துள்ளார்.

இந்த நிலையில் கேரள வெள்ள சேதத்துக்கு மின்சார வாரிய அதிகாரிகள் மீது குற்றம் சாட்டப்பட்டு உள்ளது. கேரளாவில் உள்ள பெரும்பாலான அணைகளில் இருந்து மின்சாரம் தயாரிக்கவே தண்ணீர் தேக்கி வைக்கப்படுகிறது. இதனால் அணை திறப்பு முழுவதும் மின்வாரிய அதிகாரிகள் வசம் உள்ளது.

மழை பெய்து அணை நிரம்பிய நிலையிலும் குறைந்த அளவு தண்ணீரே திறந்து நீர்மட்டத்தை சீராக வைத்து இருந்தனர். ஆனால் எதிர்பாராமல் மழை கொட்டியதால் ஒரே நேரத்தில் அனைத்து அணைகளையும் திறந்து விட்டதால் கடும் வெள்ளப்பெருக்கு ஏற்பட்டு பேரழிவுக்கு வித்திட்டதாக குற்றம் சாட்டப்பட்டு உள்ளது. #KeralaRain #MullaPeriyarDam #MMMani

சென்னை:

தமிழ்நாட்டில் இந்த ஆண்டு முன்பு எப்போதும் இல்லாத அளவுக்கு தென்மேற்கு பருவமழை அதிக அளவில் பெய்து வருகிறது.

கர்நாடகா மற்றும் கேரளாவிலும் மிக பலத்த மழை பெய்கிறது.

இதனால் அங்குள்ள அணைகள் நிரம்பியதால் உபரி நீர் திறந்து விடப்பட்டுள்ளது. கர்நாடக அணைகள் நிரம்பி வழிவதால் 2005-ம் ஆண்டுக்கு பிறகு இந்த ஆண்டு மேட்டூர் அணை 2 முறை நிரம்பியது.

காவிரியில் தற்போது வினாடிக்கு 2 லட்சம் கனஅடி தண்ணீர் திறந்து விடப்பட்டுள்ளது. இதனால் கிருஷ்ணகிரி, தர்மபுரி, சேலம், ஈரோடு, நாமக்கல், கரூர், திருச்சி, நாகப்பட்டினம், திருவாரூர், தஞ்சாவூர் மற்றும் அரியலூர் ஆகிய 11 டெல்டா மாவட்டங்களுக்கு வெள்ள அபாய எச்சரிக்கை விடுக்கப்பட்டுள்ளது.

பெய்து வரும் தொடர் மழை மற்றும் வெள்ளப்பெருக்கு காரணமாக தமிழ்நாட்டில் உள்ள 15 பெரிய அணைகளில் 9 அணைகள் முழு கொள்ளளவை எட்டி நிரம்பிவிட்டன.

இவை தவிர வைகை மற்றும் திருமூர்த்தி அணைகள் நிரம்பி வருகின்றன. நேற்றைய நிலவரப்படி 71 அடி உயரம் கொண்ட வைகை அணையில் 63.74 அடி தண்ணீர் உள்ளது. 60 அடி உயரமுள்ள திருமூர்த்தி அணையில் 52.21 அடியும், 118 அடி உயரம் கொண்ட மணிமுத்தாறு அணையில் 79.6 அடியும் தண்ணீர் உள்ளது.

நீர்ப்பிடிப்பு பகுதியில் தொடர்ந்து மழை பெய்து வருவதால் அணைக்கு நீர்வரத்து அதிகரித்துள்ளது. இதனால் இந்த 3 அணைகளும் வேகமாக நிரம்பி வருகின்றன. பேச்சிப்பாறை அணையில் பராமரிப்பு பணி நடை பெறுவதால் அங்கு முழுகொள்ளளவு தண்ணீர் தேக்கி வைக்கப்படவில்லை.

கிருஷ்ணகிரி அணையில் பழுதடைந்த ஒரு மதகு இன்னும் சரிசெய்யப்படவில்லை. எனவே அங்கும் முழு கொள்ளளவு தண்ணீர் தேக்கி வைக்கப்படவில்லை.

தமிழ்நாட்டில் வெள்ள அபாய எச்சரிக்கை விடுக்கப்பட்டுள்ள 11 காவிரி டெல்டா மாவட்டங்களில் தீவிர கண்காணிப்பு பணியில் அதிகாரிகள் ஈடுபட்டுள்ளனர். மேட்டூரில் 10 முகாம்கள் அமைக்கப்பட்டுள்ளன. அவற்றில் எடப்பாடியில் 3 முகாம்களும், சங்ககிரியில் 3 முகாம்களும் பொதுமக்கள் தங்குவதற்கு தயார் நிலையில் வைக்கப்பட்டுள்ளது.

மேட்டூர் அணையில் இருந்து அதிக அளவில் உபரி நீர் திறந்து விடப்படுவதால் காவிரி கரையோரம் தங்கியிருக்கும் மக்கள் முகாம்களில் வந்து தங்குமாறு சேலம் மாவட்ட கலெக்டர் ரோகிணி வேண்டுகோள் விடுத்துள்ளார்.

ஒகேனக்கல் அருவியில் இருந்து 1 லட்சத்து 70 ஆயிரம் கனஅடி நீர் திறக்கப்படுவதால் காவிரி கரையோரம் கட்டப்பட்டு வரும் 31 வீடுகளை வெள்ளம் சூழ்ந்தது. 46 பேர் அங்கிருந்து வெளியேற்றப்பட்டனர்.

நாமக்கல், பள்ளிப்பாளையம் மற்றும் குமாரபாளையம் பகுதிகளில் கடும் வெள்ளப்பெருக்கு ஏற்பட்டுள்ளது. கோவையில் குறிச்சி அணையில் இருந்து திறக்கப்பட்ட உபரி நீர் நொய்யல் ஆற்றின் வழியாக வெளியேற்றப்பட்டு வருகிறது. இதன் காரணமாக அப்பகுதியில் 3 வீடுகள் இடிந்து தரைமட்டமாயின.

கன்னியாகுமரி மாவட்டத்தில் தொடர்ந்து பலத்த மழை கொட்டுகிறது. தாமிரபரணி மற்றும் பரளியாறுகளின் வெள்ளப்பெருக்கு ஏற்பட்டுள்ளது. இதனால் தாழ்வான பகுதிகளில் உள்ள நூற்றுக்கணக்கான வீடுகள் தண்ணீரில் மூழ்கி கிடக்கின்றன. அங்கிருந்து மக்கள் வெளியேற்றப்பட்டு பாதுகாப்பான இடங்களில் தங்க வைக்கப்பட்டுள்ளனர். #MetturDam #MullaPeriyar #Vaigai

புதுடெல்லி:

கேரளாவில் கடந்த ஒரு வாரமாக கனமழை கொட்டி வருகிறது. இதனால் மாநிலம் முழுவதும் வெள்ளத்தில் உருக்குலைந்து விட்டது. தொடர்ந்து நேற்றும் மழை கொட்டியதால் மக்கள் அச்சத்தில் உள்ளனர்.

இந்த நிலையில் கேரளாவில் மழையின் தாக்கம் படிப்படியாக குறையும் என்று இந்திய வானிலை மையம் தெரிவித்துள்ளது. இதுகுறித்து இன்று காலை வெளியிட்ட வானிலை அறிக்கை வருமாறு:-

மேலும் கேரளா, கர்நாடகாவில் ஓரிரு இடங்களில் இன்று கனமழை முதல் மிக கனமழை பெய்ய வாய்ப்பு உள்ளது. தமிழகத்தில் ஓரிரு இடங்களில் கனமழைக்கு வாய்ப்பு உள்ளது.

தென்மேற்கு அரபிக் கடலில் மீனவர்கள் மீன் பிடிக்க செல்ல வேண்டாம்.

இவ்வாறு வானிலை அறிக்கையில் கூறப்பட்டுள்ளது. #KeralaRain #KeralaFlood

திருவனந்தபுரம்:

தென்மேற்கு பருவமழை தீவிரமடைந்துள்ளதால், கேரளாவில் கடந்த சில நாட்களாக தொடர்ந்து கனமழை பெய்து வருகிறது. இதனால் அணைகள் மற்றும் ஏரிகளின் நீர்மட்டம் கிடுகிடுவென உயர்ந்து வருகிறது. இதன் காரணமாக ஒரே நேரத்தில் 22 அணைகள் திறந்து விடப்பட்டுள்ளது. பல்வேறு பகுதிகளில் நிலச்சரிவு ஏற்பட்டு ஏராளமான வீடுகள் கட்டிடங்கள் இடிந்துள்ளன.

இடுக்கி, மலப்புரம், கண்ணூர்,  வயநாடு ஆகிய மாவட்டங்களில் கனமழை காரணமாக 29 பேர் இதுவரை பலியாகியுள்ளனர். வெள்ளத்தால் பாதிக்கப்பட்ட பகுதிகளில் ராணுவம், கப்பற்படையினர் மற்றும் பேரிடர் மீட்புக்குழுவினர் மீட்புப் பணியில் ஈடுபட்டுள்ளனர்.

இந்நிலையில், மழை வெள்ளத்தால் பாதிக்கப்பட்ட பகுதிகளை முதல்வர் பினராயி விஜயன் இன்று பார்வையிட்டார். ஹெலிகாப்டர் மூலம் அவர் பல்வேறு பகுதிகளுக்கு சென்று வெள்ள சேதங்களை ஆய்வு செய்தார். இடுக்கி, ஆலப்புழா, எர்ணாகுளம், வயநாடு, கோழிக்கோடு மற்றும் மலப்புரம் ஆகிய பகுதிகளில் இன்று வெள்ள சேதங்களை பார்வையிடுகிறார். அவருடன் எதிர்க்கட்சி தலைவர் ரமேஷ் சென்னிதலா, வருவாய்த்துறை அமைச்சர் சந்திரசேகரன் ஆகியோரும்உடன் சென்று வெள்ள பாதிப்புகளை ஆய்வு செய்கின்றனர்.